Фестивал ,,Слободна Зона‘‘ - Виница, рецензија

           Ставен на мета од страна на група млади за ден кој секоја година треба биде одбележуван со настани од културно – забавен карактер, денот на ослободувањето на Виница од фашизмот оваа година беше одбележан со целодневен фестивал каков што во нашиот град досега се немаше случено. Слободна, експлозивна, без воопшто некој да помисли на жолт картон, публиката (која реално ја имаше од сите градови во државава) несебично и еуфорично ја трошеше својата енергија на секој мал дел од сложувалката настани кои беа вклучени во програмата.
          Лоциран во градскиот парк фестивалот Слободна зона со својот широк и шарен спектар на настани кои се одвиваа од попладневните се до утринските часови ги задоволи сите вкусови и возрасти. Во склоп на дневната програма свое претставување со уметнички дела имаа млади уметници од повеќе градови кои сметаа дека со своето учество ќе го засилат групниот удар кој Слободна зона и го зададе на масата кич напливи која секојдневно не дави . Група млади на своја иницијатива решија да учествуваат на фестивалот со тоа што ќе изведат живи скулптури на главната улица и во градскиот парк, а темите кои ги презентираа претставуваа во главно метафорично и по малку саркастично разработени ситуации од секојдневниот живот. Чистачот на чевли, дилерите на духовното, воинот на коњ,  сложните марионети и многу други замрзнати слики беа предмет на анализа на љубопитната публика која со големо внимание и целосна поддршка ја проследи нивната изведба.
           Музичкиот дел го отвори Diaz Kortez со свеж DJ сет со funky deep house и nu disko вибрации  во форма на перформанс, со техника наречена ‘‘контролеризам‘‘ која вклучува семплови и cut-mix ефекти во живо. Први пред публиката дебитираа  составот Green Fuzz кои иако изведоа само пет од своите авторски песни беа доволно влијателни да ја подготват публиката за атмосферата што допрва ги очекува. Скопските  дарк денс-рок фаци ПМГ Колектив беа втори на лајнапот. Без влакна и други екстракти на јазикот фронтменот им ги залепи на присутните во лице приказните од векот за кој тие велат дека така добро започнал... како ќе заврши одлучуваме ние. Она што виничката публика го очекуваше со нетрпение беше настапот на инди пост-панк составот Bernays Propaganda, а тие нивниот очај за уживање во еден нивни концерт го забележаа по движењата (танцување, шуткање, скокање – наречете ги како сакате) и едногласното пеење на нивните песни. Скокотливи текстови со анти-политичка содржина зачинети со филозофија, бунт против злоупотребата на луѓето и животните се темите кои тие ги отворија... а фидбекот од другата страна на сцената покажа дека и тие се свесни за нештата што се случуваат околу,  оние кои не се свесни се оградуваат од настани каков што беше нашиот фестивал бидејќи таму можеби ќе осознаат работи кои ќе ги навредат и осудат нивните постапки. Трачери трет пат во Виница. Секој нивни нареден настап уште подобар од предходниот. Уште колку пати треба да ги донесеме за да го осознаеме нивниот и нашиот максимум?
          Слободна зона за слободни луѓе и настани, се залагаме за почесто слободна во иднина.

Иванова Маријана

*Рецензијата е објавена во локалниот винички весник ,,Винеам‘‘ во 2011г.

Bei The Fish feat. Ola Dioss и Фолтин во клуб Effect - Виница

        По утрото се познава денот – а ние би рекле по почетокот на распустот се познава летото. Bei The Fish и Фолтин, фин старт, нели? Со заеднички напори и сили дечките од Слободна зона успејаа да не почестат со незаборавни концерти на овие познати македонски бендови.
        На 09.06.2011г. после полноќ на концертот на електро-поп составот Bei The Fish му претходеше настап на раперот Ola Dioss кој и со самиот бенд учествуваше во изведбата на неколку песни кои се наоѓаат на нивниот најнов албум. Скопската четворка за кратко време се вклопи во атмосферата која владееше во клубот и за која тие придонесоа да кулминира за време на нивната изведба. Рибата Беј (во состав: Огнен Анастасовски, Валентина Миновска, Ненад Тонкин и Владимир Настевски) скоро два часа ја заплискуваше публиката со свиоте љубовни приказни пронижани со ‘’danceable’’ електро мелодии. Пријатно изненадени и двете страни – публиката од извонредната журка која бендот ни ја овозможи, а тие пак од ‘’фидбекот‘’ кој го добиваа од истата (непрестано играње, пеење, громогласни аплаузи и секако, кој би останал рамнодушен на извиците ,,УУУУШТЕ! УШТЕ!‘‘- еден бис).
        Не ни успеавме убаво да си ги средиме впечатоците од таа вечер кога веќе наредната (10.06.2011г.) ги пречекавме Фолтин во истото време и на истата локација (клуб Effect – Виница). Љубовните тематики и страста беа опејувани и од овој бенд (Бранислав Николов –вокал, Пеце Николовски – кларинет, Гоце Јованоски – бас, Пеце Трајковски – хармоника и Славчо Јовев – тапани), но овојпат придружувани со многу поинаква музика која е тешко да се дефинира на кои музички правци им припаѓа. Кој ги слушнал претходно можеби и знаел кое добро го очекува, а оние кои не беа слушнале беа задоволни што си ја згаснаа жедта да чујат нешто несекојдневно и оригинално. Разиграната публика првпат типкаше љубовно писмо со помош на трансплантираната машина за чукање и едногласно ја потсети Милица на нејзината младешка љубов. Толку ни беше пријатен настанот што не сакавме да заврши и кутрите луѓе ги изнамачивме, искрено не се сеќавам колку пати ги вративме на бис.
       Овие две вечери беа вистинско енергетско освежување за повеќе генерации и затоа им укажуваме благодарност на клуб Effect и музеј ,,Теракота‘‘ – Виница кои ни излегоа во пресрет за организирање на настанот. Слободна Зона има уште многу планови за да го направи летото позабавно но за тоа е потребна вашата поддршка.

Маријана Иванова


*Рецензијата е објавена во локалниот винички весник ,,Винеам‘‘ во 2011г.

...за ,,Ако никој не свири’’

          ,,Ако никој не свири‘‘ е македонски документарен филм кој преку музичката кариера на Васко Атанасоски (FxPxOx, Bernays Propaganda, Xaxaxa) отсликува дел од скопската hardcore punk, straight edge сцена во изминативе десетина години, и инди рок сцената која кај нас е се повеќе барана во последниве неколку години.

         Хардкор бендот FxPxOx (Forever Positivly Obsessed / Засекогаш Позитивно Опседнати), во кој фронтмен е токму Васко, опстојува како состав од 2001 до 2008 година, со својата идеологија инспирирана од анархистичките идеи на панк сцената од осумдесетите се бунтува против нацистите, злоупотребата на луѓето и животните, хомофобијата, наркотиците, полицијата... и секако не потсетува дека не треба да кукаме за ‘‘старите добри денови‘‘ бидејќи сцената која сме ја имале некогаш, а што е најважно - таа што ја имаме сега, со својата енергија и искреност воопшто не заостанува зад светската.

        Самиот акцент на оваа филмска лента е ставен на почетоците на скопскиот инди рок бенд Bernays Propaganda, формиран во 2007 година, периодот поминат во студио за време на снимањето на нивниот прв студиски албум Happiness Machines и нивните размислувања во врска со музиката, како и јавноста. За да не мислиме дека во животот се е розово, во филмот се прикажани и конфликтни ситуации кои најчесто се последица на различните карактери и гледни точки на човекот како индивидуа

        Во меѓувреме, додека филмот да биде целосно завршен, Bernays Propaganda во склоп на многуте европски турнеи настапија во голем број европски градови, и секој нивни настап е позитивно оценуван и критикуван во медиумите, а нивниот втор студиски албум My Personal Holiday беше прогласен за албум на годината според plagij.at и Канал 103.

        На 8 Април во организација на музејот ,,Теракота‘‘ и Слободна зона во Виница беше прикажан „Ако никој не свири“, кој минатиот месец ја освои наградата за најдобар филм во регионалната конкуренција на петтото издание на фестивалот на документарен рок-филм ДОРФ, кој се одржа во Риека и во Винковци. Режисерот на овој филм - Ѓорѓи Јаневски присуствуваше на проекцијата и имавме прилика да го запознаеме и да слушнеме за дел од неговите искуства во врска со снимањето на филмот.

Маријана Иванова

T.Б. ТРАЧЕРИ (25.02.2011г.) @ Клуб „Ефект“ - ВИНИЦА

     Од неодамна низ Виница почнаа да се шират трачеви за уште еден терористички напад на бандата рокенрол ѕвезди, ТРАЧЕРИ. Виничката публика (секако и гостите од другите градови) не останаа рамнодушни после нивниот прв концерт во нашиот град (на 08.01.2010г.) и со нетрпение го исчекуваа нивниот нареден концерт кој овојпат се одржа на една локација на чија сцена никогаш не би помислиле дека ќе настапи еден ваков бенд. Да, станува збор за ноќниот клуб „Ефект“. Сега кога веќе некој го скрши мразот можеби ќе имаме прилика почесто да следиме настапи на бендови од ваков тип.

     По дружбата со бендот и ’загревањето’ во кафе „ВИП“ Виничката елита (како што Кирил Арсов ги нарече своите фанови)ја продолжи својата ефектна ноќ на местото на настанот.

     За експлозивниот настап на Т.Б. Трачери не припремија еден нов винички состав кој го подготви својот репертоар “со брзината на светлината“. А баш ви звучеа како да се спремале со месеци, нели? Овој бенд изведе четири песни од кои три беа авторски, дела на професорот Орце Павлов, кој имавме прилика да го видиме на сцената како вокалист и басист, придружуван од Кристијан Стоименов и Зоран Павлов на гитара и Дејан Јефремов на тапани.

     Трачери во состав Кирчо Арсовски (вокал, гитара), Кирил Арсов (бас гитара, придружен вокал), Ивица Димитријевиќ (гитара) и Андреј Анастасов (тапани)два часа по полноќ ја нападнаа публиката со своите рокенрол хитови: „Мама не ти дава“, „Kinky”, „She’s a bomb”, „Трач мантра“, „Ја сам убав“ и други. Легендарната музика на овој бенд во комбинација со лајт-ефектите направија публиката да ги почувствува вибрациите на шлагерскиот бран кој го преплавуваше клубот неполни два часа. Енергијата и еуфоријата во клубот непрестајно извираше од инструментите на овие четири музичари од кои на фановите никогаш не им е доста. Успеавме да се “исценкаме“ со нив за еден бис кој тие со задоволство го изведоа за своите љубители. Ја имавме честа и да проследиме неколку од новите песни од нивниот најнов албум, кој после долго исчекување и одложување ќе излезе во продажба во некој од наредните месеци.

     Благодарноста за овој легендарен концерт им ја должиме на најефектниот клуб „Ефект“, музејот „Теракота“ и секако најдобриот македонски рокенрол бенд Т.Б. Трачери.

     (П.С. Велат ако има прв пат не значи дека ќе има и втор. Но, ако има втор пат сигурно ќе има и трет. Виничката сцена можеби ќе им стане едно од најомилените места за настап на овој бенд. :) )

Mаријана Иванова

*Рецензијата беше објавена во локалниот винички весник ,,Винеам‘‘ во 2011г.

КОНЦЕРТ НА Т.Б. ТРАЧЕРИ ВО ВИНИЦА (08.01.2010г.)

          Велат кој чека – ќе дочека. Ние ја дочекавме вечерта кога виничката сцена за првпат ја нападнаа добро познатата Терористичка Банда ТРАЧЕРИ! (Во состав Кирчо Арсовски (гитара, вокал), Кирил Арсов (бас, придружен вокал), Ивица Димитриевиќ (гитара) и Андреј Анастасов (тапани).)
          На нејзино ’’разочарување’’ публиката, на која и беше многу удобно во седиштата, беше замолена да стане и се придвижи во ритамот на познатите рокенрол мелодии на овој уникатен, култен македонски бенд. На почетокот срамежливо – но потоа многу поопуштено фановите (кои ги имаше во навистина голем број, од повеќе градови) реагираа на шлагерските приказни кои Трачери ги раскажуваат во своите песни. Саркастичните и цинични стихови кои на многу би им звучеле неприфатливи овојпат публиката ги пееше едногласно со бендот, и најверојатно голем дел се пронајдоа во истите. По двата возбудливи биса сите ја напуштија Сината сала и трачерската еуфорија ја продолжија со дружење во некои од виничките кафулиња.
          Задоволен од концертот Кирчо Арсовски ја нарече Виница македонски Шефилд, а домаќинот Кирил Арсов изјави:
- Овој концерт им го посветувам на моите пријатели, моите родители и сите искрени поклоници на рокенролот од градот. 
Верувам дека фановите на Трачери со нетрпение очекуваат да излезе нивниот најнов албум, четврти по ред, од кој неколку песни беа изведени токму на овој концерт.
          Реакциите на публиката велат дека треба многу почесто да се организираат концерти од ваков вид за кои глувата македонска јавност нема високо мислење (или воопшто нема никакво мислење!). Благодарност до Дом на култура ’’Тошо Арсов’’ – Виница и секако до легендарните Трачери кои ни овозможија да присуствуваме на ваков настан, каков, за жал, во Виница се случува многу ретко.

Иванова Маријана


*Рецензијата беше објавена во локалниот винички весник ,,Винеам‘‘ во 2010г.

BERNAYS PROPAGANDA ВО ВИНИЦА (02.07.2009г.)

          Инспирирани од поимот ''современа наука - односи со јавноста'' , налетувајќи на името ''Едвард Бернајс '' (автор на книгата Пропаганда), Васко, Кристина, Џано и Ненад решаваат да го формираат бендот Bernays Propaganda. Активностите кои музичарите во Скопје ги манифестирале јавно ги поттикнале овие четири личности да му се придружат на овој бран музика, најчесто со политичко-филозофски 'бекграунд' кој често е критикуван од публиката. 
Излегувајќи прв пат на македонската сцена во 2007 година, оставаат зачудувачки позитивен впечаток кај поголемиот дел од публиката. Но, чести се стереотипите за бендовите дека треба да се вреднуваат озвучувањата и посетеностите на нивните настапи. Овој бенд сака да го постигне сосем спротивното! Поентата во нивните настапи е да дискутираат со публиката пред, и после настапот, и да бидат запомнети не само како личности кои само си ја вршат својата работа, туку како личности кои ја искажуваат својата визија за светот преку музиката.
          Втори Јули (2009) беше денот кога бевме почестени со нивното присуство во нашиот град и имавме чест да проследиме еден нивни извонреден настап во живо. Љубителите на инди-рок музиката можеа да го проследат едночасовниот концерт во кафе ''Гала''. Според реакциите на многубројната публика (земајќи ја во предвид големината на нашево гратче) вакви настани би било добро да се случуваат почесто. Верувам дека на луѓето кои присуствуваа на овој концерт ќе им биде тешко да ја заборават таа летна вечер што Bernays им ја разубавија со својот извонредено квалитетен настап. 
          -''Колку ќе издржам сам со себе не знам, колку се познавам се плашам ако прогледам''...Откривање на себеси, отфрлање на принципите наметнати од општеството... Тешко да се направи и ретко кој го прави, но сепак има многу луѓе кои се трудат околу тоа, едни од нив се и ,,Bernays Propagandа''. Изразување на револтот и незадоволството преку музиката, внесување новости и едуцирање на поразличен начин, кај нас недоволно ценети и непознати, но сепак добро ни покажаа на сите нас, кои се, што се, за што се борат и колку нашето општество е пропаднато во својот сопствен измет... Накратко,одлична свирка, со уште подобра поука, и прекрасна едночасовнa забава и опуштање... Секоја чест!!! – прокометира Иван Ивановски кој исто така присуствуваше на овој настан.
          Мислам дека нашата најголема благодарност за овој несекојдневен настан, кој беше големо освежување во нашето еднобојно секојдневие, им ја должиме на бендот Bernays Propaganda и организаторот на концертот ,,ФАБРИКА 999''. 

Иванова Маријана


*Рецензијата беше објавена во локалниот винички весник ,,Винеам‘‘ во 2009г.